De taal van internet

(Zösters)

Went de bookdrökkuns de luuj haet lieëre laeze, den haet internet de luuj lieëre sjrieve. De massa posts and tweets en WhatsApps is neet bie te hawte. Waat opvilt is det ’t sjrieve in dialek eine nuje zjwung gekrege haet. Op Facebook zeen weer ummer mieë deilnummers die hun Limburgs dialek gebroeke óm berichte nao vrunj te sjikke. En wo weer allemaol sjuuj wore det de jeug ’t sjpraeke en sjrieve van ‘t Limburgs verlieërt, zeen weer op internet det in die categorie ’t dialek sjus ummer mieë gebroek wurt. Jóngere make zoa wie zoa al väöl intensiever gebroek van social media en noe bliek det sjus die sjtreektaal det get perseuënlikker en vertroewder maak.

Mer ouch es men de Limburgse taal neet gebroek kan internet biedrage aan ‘t zelfbewuszeen van Limburgse jóngere. Dylan Haegens is ein van de meis succesvolle vloggers van Nederlandj. Hae kump oet Limburg en det wilt hae weite. Kiek mer éns nao zien “10 Voordelen van Limburg.”

Limburgse Wikipedia

Get bezunjers op internet is zeker de Limburgse Wikipedia. Dao-in staon lemma’s besjreve uuever versjillendje óngerwerpe in de Limburgse taal. Gae kóntj dinke aan besjrievinge van weitesjappe wie bv. sociologie, chemie, sterrekunde en genaeskunde. Mer ouch uuever kuns en cultuur, wie architectuur, sjilderkuns, film en literatuur. Of gewuuen alledaagse óngerwerpe: koeake, sport, tuiniere. En neet te vergaete  de typisch Limburgse vastelaovendj. Gae kóntj de Limburgse Wikipedia hie bekieke.